Goeie Nuus: God se genade is grensloos
29 Augustus 2010
Die verhaal van Jona
Ons werk hierdie week met die hele verhaal van Jona. Dit sal goed wees om groepslede voor die tyd per sms te vra om die hele verhaal as `n eenheid deur te lees.
PRAAT SAAM
Dink julle God vra min of baie van ons? Hoekom sê jy so?
PRAAT MET GOD
Vra God om deur die verhaal van Jona vir ons te wys hoe hoog, diep, ver en wyd sy liefde vir mense strek.
LUISTER NA DIE WOORD en na mekaar
Lees Jona 1:1-3
- God roep en stuur Jona na Nineve, maar hy koop `n kaartjie en vlug na Tarsus. Is ons nie maar almal so nie? Wil ons nie uitgelos word om ons eie ding te doen nie? Op watter maniere vlug ons van God se roepstem?
- Jona vlug, want hy wil nie dat Nineve red nie. Nineve was die hoofstad van die wrede Assirïërs wat vanaf 1100 v.C. baie volke in die Ou-Nabye Ooste verneder en ook die stad Jerusalem verwoes het. Jona het gedink God se genade behoort aan Israel en nie aan hulle wrede vyande nie. Hy het dus in `n volksgod geglo. Maak ons nie soms of God aan ons behoort en net vir ons lief is nie? Op watter maniere eis ons vandag God se genade vir onsself op?
- Waar dink julle is Nineve vandag? Kan ons sê Nineve is hier waar ek en jy nou is? Jy woon tog nie toevallig in Pretoria nie. As God jou in Amerika wou hê, sou hy jou daar geplaas het. Vertel vir mekaar hoe jy dink jy God se goeie nuus in jou wêreld van elke dag dra en bekend maak? Doen ons dit op bewuste of dalk ook op onbewuste maniere?
God stuur `n groot storm en Jona word oor boord gegooi. Hy beland in `n vis se maag. Daar sit Jona. God het hom ingehaal en hy het oorgegee. Sy toekomsplanne is aan flarde. In die donkerste hoekie van sy lewe. Ingesluk deur die woeste see, ingesluk deur 'n groot vis. In 'n diep donker plek weg van alle lig, weg van alle hoop. Daar sit Jona. En wat doen hy? Hy doen die enigste ding wat jy kan doen in die donkerste hoekie van jou lewe. Hy bid. Hy bid tot God.
Lees Jona 1:17-2:6
- God verhoor sy gebed. God gee aan Jona `n tweede kans. Ons kan sê God is `n God van tweede kanse. Is daar iemand in die groep wat hiervan kan getuig? Vertel vir mekaar van God se goedheid in jou lewe. Wees asseblief spesifiek.
Lees Jona 2:10-3:5
- God praat weer met Jona en nou doen hy wat God vra. Ons kan sê Jona lewer die kortste bekeringspreek in die geskiedenis met die grootste sukses. Nineve het berou. Die koning, mense en diere rou, hulle treur, hulle bely hulle sondes. Eintlik vra God min van Jona. God wou met Jona `n pad stap en vir Jona wys wie Hy is. God neem verantwoordelikheid, al wat Jona moes doen was om God se hart te reflekteer? Eintlik vra God ook nie so veel van ons nie. Probeer na aanleiding van Jona se verhaal, in jou eie woorde sê wat jy dink God van ons vra?
Lees Jona 3:10, 4:1, 4-11
Ons kom nou by die laaste episode van Jona. God spaar vir Nineve, en wat doen Jona? Hy is kwaad! Hy gaan sit buite die stad en hoop om te sien hoe God die stad gaan vernietig. Wat doen God? Hy laat 'n wonderplant opkom om vir Jona skadu te bied van die gloeiende son. Jona is baie bly hieroor. Dan laat God 'n wurm kom om die plant op te eet en die son ongenaakbaar op Jona neerbrand. “Jy is kwaad oor 'n plantjie wat vir jou skadu bied wat ek wegvat, maar jy wil nie eers hê ek moet genade bewys aan soveel duisend mense nie.” Die storie oor Jona gaan nie oor God se straf nie, maar oor God se genade. Dit gaan oor God wat tweede kanse gee. Die God wat ons aanbid is 'n tweede-kans God. God gee vir Jona 'n tweede kans. Hy red hom van die storm. God gee ook vir Nineve 'n tweede kans. God gee ook vir jou lewe 'n tweede kans. By God is daar altyd nuwe moontlikhede. Saam met God beland jy nooit in 'n doodloopstraat nie. God droom nuwe drome vir ons as hy ons roep.
WAT GAAN ONS DOEN?
Ons onderneem om hierdie week genadig en met liefde op te tree teenoor mense wat ons dink nie God se genade verdien nie.
GEBED
Vra God om elkeen in die groep se oë oop te maak om raak te sien waar hulle sy genade hierdie week kan uitleef. |