Hier is ek tuis

Om iewers te behoort is die lekkerste gevoel in die lewe! Dit is ‘n warm gevoel om te weet jy behoort hier, of dit nou by jou huis, by die skool, universiteit of kerk is.  Ons bedieningsmodel het as uitgangspunt dat lidmate óók ‘n verantwoordelikheid het ten opsigte van hul eie pastorale versorging. Dit is wenslik dat Skuilkrans se lidmate by ‘n kleingroep inskakel as primêre versorgingspunt; lidmate wat nie deel van ‘n groep is nie kan gerus vrymoedigheid neem om ‘n besoek van ‘n predikant te vra, of dit om ‘n spesifieke rede is of selfs net vir ‘n bietjie gesels.  Ons leraars doen ook moeite om alle nuwe intrekkers persoonlik te ontmoet. Die een belangrike voorneme wat ons graag gestand wil doen, is om onbetrokke lidmate te betrek en te laat tuiskom in ons gemeente – ons is mos daar vir mekaar!

Verskeie kategorieë van lidmate word bykomend pastoraal versorg. Daar is behoorlike strukture (en bedieninge) opgestel om veral by die senior en die jeug van die gemeente uit te kom.  Die Leef Weer Sentrum bereik mense wat getraumatiseer is, of wat verhoudings- en persoonlike probleme het.

Daar is ook ‘n groeiende pastorale kontakpunt rondom:

·         doopgesprekke

·         huweliksgesprekke

·         belydenis van geloof

·         ouerleiding

·         hospitaalbesoeke

·         sterwensbegeleiding

Die leraars het die werk soos volg onder mekaar verdeel:

Enige lidmaat kan met die grootste vrymoedigheid ‘n leraar skakel.

Moenie skroom om dit te doen nie.